In passa 250 lös in tuot la Svizra do que ün «Repair Café». Ün da quels as rechatta daspö l’an 2022 a Samedan ill’ustaria da la stalla Dosch. Mincha duos mais s’inscuntran voluntaris cun persunas chi vöglian lascher cumader u cumader svess ogets ruots.
Sajan que maschinas da chadafö ruottas, giovarets u eir vstieus cun fouras, i’l «Repair Café» es mincha oget ruot bainvis. Sch’el po gnir cumado dependa adüna ün pô da las persunas chi güdan quel di e da lur qualificaziuns. Cler es, üna maschina da cusir es adüna pronta ed eir differentas üsaglias mettan las organisaturas a disposiziun. Üna da las iniziantas dal «Repair Café» a Samedan es Selina Nicolay, commembra dal partieu socieldemocratic e presidenta cumünela da Bever. «Il cafè es naschieu düraunt il cumbat electorel pel Grand cussagl l’an 2021. La PS vaiva insembel culs verds üna glista e nus ans vains dumandos che temas chi ans occupan ed ün da quels d‘eira la persistenza. E lura es gnida l’ideja da lantscher ün «Repair Café».» L’ideja es gnida accepteda bain e perque eir gnida mantgnida. Intaunt però na pü cul fuonz politic, hoz es que üna gruppa luocha chi fo ir ils cafès. Fin hoz fo Selina Nicolay las lavuors davous las culissas e disch: «L’ideja da cumader roba ruotta, impè da la bütter davent e cumprer nouv, correspuonda a mia filosofia da viver ed es perque üna roba da cour.»
Cunterpais a la societed da consüm
L’ideja dal «Repair Café» es da der cunterpais a la societed da consüm e da redür las muntagnas d’immundizchas. Lantscho l’ideja vaiva la fundaziun per la protecziun da consüments l‘an 2014. Fin hoz sustegna ella ils cafès da reparaturas cha que do intaunt in tuot la Svizra. Tenor la fundaziun es üna reparatura suvenz pü bunmarcheda e megldra per l’ambiaint cu da cumprer nouv ün’apparat u ün oget. Chera es suvenz la lavur da reparatura e quella crouda davent tals cafès, già cha las reparaturas vegnan fattas da persunas voluntarias. Cha dasper la reparatura scu tela, saja eir il ster da cumpagnia üna part importanta, disch Selina Nicolay. Uschè sajan ils cafès suvenz eir zievamezdis cun bgeras risedas e discussiuns vivas.
Ils cafès haun lö mincha duos mais, l‘ultim marculdi dal mais, la prosma vouta in marculdi, ils 26 november 2025, da las 16.00 – 19.00h ill‘ustaria da la stalla Dosch.
