Da que es Luzi Oberer, il president da la societed biblioteca Samedan/Bever persvas. Eir u forsa güst in ün muond digitel.
Per river in biblioteca as stu ir in murütsch. Aint il murütsch suot la sela da gimnastica da la scoula cumünela. L‘atmosfera nun ho però da chefer ünguotta cun ün murütsch. Las paraids sun culuridas in diversas culuors chodas. Giò per terra ho que ün tapet. La glüsch es clera e choda ed in minchüna da las quatter staunzas ho que pussibilteds da tschanter giò e sföglier. Passa 8‘000 cudeschs as po impraster illa biblioteca. La collecziun cuntegna cudeschs da pops, cudeschs per iffaunts, cudeschs per giuvenils, cudeschs tematics, belletristica e natürelmaing eir üna granda variaziun da crimis. E na da schmancher sun ils comics e‘ls magazins chi staun a disposiziun.
Pel president da la societed biblioteca Samedan/Bever es la biblioteca ün lö da cour. Ün lö, inua ch‘el as sainta bain e vain eir üna vouta a ster pachific e ler ün pêr paginas. Impustüt scha que ho do nouvs cudeschs. Ün cudesch predilet nun ho‘l nempe. «Que do uschè bgers bels cudeschs ch‘eau nu riv da‘m decider. Ma eau leg gugent cudeschs d‘istorgia e «Bergünerstein», per exaimpel, m‘ho fascino fich.» Crimis percunter nu legia‘l gugent u cu ch‘el disch da se svess, be sch‘el stu.
La biblioteca publica e da scoula
La biblioteca Samedan/Bever es üna biblioteca publica. Ellas es però eir la biblioteca da las scoulas da Samedan, Bever ed eir da Schlarigna. Davent da la scoulina haun ils scolars e las scolaras la pussibilted dad ir in biblioteca. L‘imprast da cudeschs e medias es gratuit per tuot las scolaras e‘ls scolars. Pü tard paun las scolaras e‘ls scolars nüzzager las localiteds eir per lavuors da scoula, quasi scu ulteriura staunza da scoula. Cha que vegnia eir fat, declera Luzi Oberer e saja bel da vzair. Cha da metter a disposiziun las localiteds hegia eir da chefer cha‘s vöglia der mincha pussibilted pussibla ad iffaunts e creschieus da gnir in contact cun cudeschs ed uschè promouver il ler. «Que ans sto a cour. Ler es la basa per scriver, la pussibilted da sfundrer in muonds incuntschaints ed ün cudesch po eir esser ün‘agüd.» Perque es Luzi Oberer eir persvas cha‘l cudesch ho e varo eir in avegnir üna granda valur. Independentamaing, scha quel vain let in fuorma da palperi u in fuorma digitela.
La biblioteca es eir moderna
Illa biblioteca as chatta dasper cudeschs eir aunch‘üna selecziun da DVDs ed üna schelta da discs cumpacts cun cudeschs auditivs per iffaunts e creschieus. Chi chi‘d ho ün abunamaint da la biblioteca ho però eir access a la Dibiost, la biblioteca digitela da la Svizra orientela. Quella spordscha passa 30‘000 cudeschs digitels (ebooks), passa 6‘000 cudeschs auditivs e diversas giasettas e magazins. Quella spüerta do que daspö l‘an 2019 e vain nüzzageda daspö lo fich bain. L‘an passo sun gnieus imprastos güst uschè bgers cudeschs digitels scu cudeschs da creschieus illa biblioteca da Samedan/Bever. Ils pü bgers cudeschs imprastos d‘eiran però cudeschs d‘iffaunts e giuvnils. E que saja eir cler, pervi da la collavuraziun culla scoula.
Ün sortimaint variabel ed occurrenzas
Per la suprastanza da la societed biblioteca Samedan/Bever ed eir per la mnedra Jeannette Jakob e las collavuraturas Selina Bisaz e Ruth Bezzola es que important cha la biblioteca viva e‘s sviluppa. Perque vegnan minch‘an cumpros nouvs cudeschs. L‘an passo sun gnieus tiers 543 nouvas medias. Da l‘otra vart s‘ho sortieu our 476 cudeschs vegls e ruots ed otras medias. Uschè nu saja il sortimaint static e‘s sviluppa e cun que as possa fer adüna darcho nouvas scuviertas. Ils cudeschs vegls vegnan dal rest ubain vendieus per ün pitschen rap tar l‘entreda da la biblioteca ubain do inavaunt al marcho da cudeschs da la societed da gimnastica.
Duos voutas l‘an organisescha la biblioteca prelecziuns, que do ün circul da ler ed ün start da cudeschs per iffaunts pitschens. E la biblioteca as partecipescha eir mincha november a la not da quinter cun ün program vario per iffaunts. Üna visita, saja que ad ün‘occurrenza u simplamaing in biblioteca, vela dimena in mincha cas la paina.
Diesen Artikel könnt ihr auch auf deutsch lesen.
