Als gös olimpics europeics da giuventüna a Bakuriani in Georgia, ho Nina Cantieni guadagno üna medaglia d’or e duos medaglias da bruonz. Que es ün success inaspetto chi svaglia aspettativas per l’avegnir.
«Scha qualchün am vess dit ch’eau possa guadagner trais medaglias vessi suottascrit que ouravaunt», disch Nina Cantieni pochs dis zieva ch’ella es turneda da Bakurianicun ün surrir in fatscha. Las trais medaglias pendan intuorn sieu culöz. Ella es güst gnida bivgnanteda ed onureda da sieu club da skis Piz Ot Samedan e dal president cumünel Gian Peter Niggli. Ün mumaint speciel per la giuvna Samedrina da 17 ans. Üna gratulaziun segua a la prosma, tuots sun superbis da Nina chi’d es svess creschida sü aint il club, ho fat tres tuot ils s-chelins da l’JO e trenescha hoz cun Engadin Nordic.
Cumanzo a fer passlung ho ella già scu mattina, aunch’aunz cu ir a scoulina. Il frer grand d’eira l’exaimpel e’ls genituors eir gugent in gir süls skis da passlung. Ed uschè ho’la già bainbod miss sü il prüm numer e cumanzo a fer cuorsas. «Il club da skis es fich important per me. El ho svaglio in me il gust per quist sport», disch’la. Intaunt trenescha Nina Cantieni chi festagescha quist’an sieu 18evel anniversari 10 fin 15 uras l’eivna e’s partecipescha a cuorsas naziunelas ed internaziunelas. Ella fo il gimnasi a l’Academia Engiadina e frequentescha lò la 5evla classa da sport. Aunz eir’la a la Scoula Sportiva.
Il prüm punct culminant da la stagiun
In schner ho Nina Cantieni musso già in möd impreschiunant cha la fuorma tuorna. Ella ho guadagno duos titels da champiunessa svizra a Jaun. Ella ho guadagno or i’l sprint ed eir illa cuorsa da 10 kilometers in stil classic. Ün bel success per la giuvna Samedrina. «Lò d’he bado cha sun in fuorma e lura d’eira que natürelmaing cool cha que es ieu sü uschè bain», disch’la tuot modesta. Zieva quels champiunedis è’la gnida selecziuneda per pudair viager al European Youth Oylmpic Festival a Bakuriani in Georgia. A quels gös olimpics europeics da giuventüna è’la viageda cul böt da fer resultats da top-10. Già illa prüma cuorsa, quella da 5 kilometers classic, ho’la però guadagno la prüma medaglia, quella da bruonz. «La prüma medaglia d’eira ün success inaspetto chi ho do granda motivaziun per las ulteriuras cuorsas.» La medaglia hegia eir piglio davent magari squitsch. Nina Cantieni ho gieu ün program enorm. Ella s’ho partecipeda a tuot las cuorsas da passlung. Illa cuorsa da 7,5 km in stil liber è’la gnida 9evla.
Il sprint – la disciplina da parada
Lura es gnieu il sprint, la discziplina da parada da Nina Cantieni. E lò ho’la declasso la concurrenza europeica: ella ho guadagno uschebain la qualificaziun scu eir tuot las cuorsas da finel. «Aint il sprint d’heja gieu ils meglders resultats quist’an, perque d’he eir gieu böts pü ots per quista cuorsa», disch’la. E tuottüna, da dominer telmaing l’intera cuorsa nu d’eira da spetter ed es üna prestaziun enorma. Cha da pudair ir la saira a la surdeda da la medaglia e d’udir l’imna svizra, saja sto speciel ed eir emoziunel. «Eir da vzair l’inter team davaunt il palc.» Insomma disch’la ch’ella nu vess mê spetto da pudair guadagner güst trais medaglias.
Cun quellas trais medaglias d’eira Nina Cantieni üna da las atletas svizras cul pü grand success al EYOF ed ho perque pudieu purter la bindera svizra a la festa finela. Que saja sto üna grand’onur per ella. A chesa nu pigl’la però «be» las medaglias mabain eir las experienzas, ils contacts cun oters sportists svizzers ed eir il sentimaint dad esser steda immez ils sportists giuvents da tuot l’Europa. Ed eir üna u l’otra nouva amicizcha hegia que do. A d’eiran nempe tuot ils atlets e tuot las atletas svizras i’l glistess hotel.
Ed in avegnir?
Ils success da quista stagiun svaglian natürelmaing tschertas aspettativas e nudreschan ün u l’oter sömmi. Eir quel da partir ün di illa coppa mundiela. «Intaunt vulessi glivrer la stagiun cun buns resultats, in avegnir ir als champiunedis mundiels dals juniors e chi so – da partir ün di illa coppa mundiela füss sgür cool», disch’la e piglia incunter ulteriuras gratulaziuns. Il pü important per ella resta però da mantgnair il plaschair ch’ella ho da fer passlung.
Diesen Artikel könnt ihr hier auf deutsch lesen.
