Dad Andrina Lüthi, 8evla reela II

«Attenziun, attenziun nus essans güst al böt!», disch la raketa chi svoula sül mars cun üna gruppa d’umauns. Els vulessan ir a guarder che chi viva tuot sül mars. Els cumainzan a chaminer. Tuot in üna vouta vain qualchosa da davous. Tuot la gruppa dad umauns cuorra uschè svelt scu pussibel inavous tar lur staziun. Cur cha tuots sun in sgürezza cumainzan els a discuorrer ün traunter l’oter: «Che es que?» «Eau d’he temma!» Zieva poch temp sun tuots staungels e vaun in let, be ils duos iffaunts Martina e Jana vöglian savair, che cha que d’eira. Cur cha tuot ils grands sun in let, vaun ellas our. Tuot in üna vouta cumainza Martina a sbragir. Jana guarda inavous e vezza, cu cha Martina vain transporteda davent da duos umauns fich curius. Quels umauns sun verds ed haun ögls scu lindornas. Jana voul güst ir a güder a Martina. Ma eir ella vain uzzeda sü dad ün uschè tips curius. Ellas vegnan transportedas sgür fin a mezzanot. Quellas creatüras curiusas nu sun nempe uschè sveltas scu nus umauns. Alura vegnan Martina e Jana missas in üna pitschna staunza, inua cha sun duos lettins, üna maisina e duos s-chabels. Tuot staungels croudan ils duos iffaunts aint ils lets. La bunura bod bada la gruppa dad umauns illa staziun cha Martina e Jana maunchan. Plain temma dian els: «Nus sperains cha ellas nu sajan idas our e sajan gnidas attachedas darcho da davous.» Intaunt sun Martina e Jana eir sdasdedas. Ün da quels tips curius vain aint e porta la culazchun. Sün duos plats es qualchosa curius. A guarda our scu üna chamma dad üna rauna be cha quella es melna e blova. Tuot in üna vouta disch Martina: «Ah, eau se chi cha quistas creatüras sun! Que sun Aliens!» «Schiiiii, tü hest radschun.», respuonda Jana. Intaunt sun ils genituors a telefoner culs umauns giò sün terra. Els vöglian cha vegna üna supereroina a deliberer a Martina e Jana. Pochas uras zieva placha üna seguonda raketa. Ella es suuuper svelta. Uossa chamina our üna supereroina chi ho nom Andrina. Ella so svuler. Ils genituors dian ad ella ch’ella dessa ir a tschercher a las duos mattas. Ella cumainza güst a svuler e pochs minuts zieva vezza ella üna vschinaunchina. Ella so dalum cha cò sun Martina e Jana. Ella svoula giò, güst illa dretta staunza e baincumel, cò sun las duos mattas. Andrina disch: «Allegra, eau sun Andrina e sun cò per deliberer a vussas.» Ed uschè svoulan las trais darcho inavous tar la staziun. Las duos raketas sun già prontas per svuler giò sül muond. Tuots haun uossa vis avuonda per savair, che cha que do tuot sül mars. Sül viedi inavous raquintan Martina e Jana a tuots, che cha’d es tuot capito düraunt la not.

Eau scu supereroe

Da Dominic Flück, 8evla reela II

Nus scrivains l’an 2034, meglder dit ils 7-8. Eau sun insè già ün eroe: Eau sun nempe pumpier da tuot cour. A riva ün alarm: Tuot ils pumpiers da l’Engiadina stöglian ir a güder a stüzzer ün fö da vegetaziun. Noss pumpiers sun ils seguonds chi rivan tar l’incendi. Puntraschigna ho già miss sü la tenda e l’auto da cumand. Eau guard aint per la val: be füm e flammas, tuot la Val Roseg arda, il tschêl tuot s-chür. Eau ed ün pêr amihs da pumpiers pigliains il materiel e giains a tschercher üna chamanna illa quela dessan auncha esser aint persunas. Tres il func vains alura auncha udieu cha ils pumpiers La Plaiv, Schlarigna e San Murezzan sajan eir gnieus tiers. Tuot in üna vouta udins sbregs our dal fö, nus serrains ils ögls e cumanzains a chaminer in direcziun dals sbregs. Nus vzains la chamanna ed il tet chi arda cullas fnestras chi sun ruottas da la chalur. Cuaint, quatter persunas giuvnas, circa scu eau. Nus entrains e dschains ad els ch’els dessan seguir a nus. Nus giains our da la chamanna, ün hom dad els cumainza directamaing a cuorrer vers il fö! Eau vez, cu ch’el cuorra, od ün sfrach dad ot e cumainz a cuorrer zieva a l’hom chi cuorra uossa vers ün bös-ch chi arda. Cur cha’l bös-ch es güst per cruder, dun eau ün sagl e clap güst auncha l’hom. Ün mez meter davous nus crouda quist  bös-ch. Mieus amihs rivan alura auncha cun las otras persunas. Eau d’he mel, ma se cha d’he da fer üna lavur. Cun bger curaschi chaminains inavaunt. In quel temp sun gnieus duos Canadais cl-415 da l’Italia per güder a clapper il fö suot controlla. E darcho ün bös-ch chi crouda, ma quista vouta nu riva ün da mieus melgders amihs pü da’s svier. Nus al strains our da las flammas, ma el es mort. Eau pigl mieu amih mort sülla spedla e nus chaminains inavaunt. Dandettamaing vzains ün auto da pumpiers, ma apunto be ün, e quel arda. Nus dains auncha svelt ün cuc aint il auto per esser sgürs cha nu saja aint pü üngün. Per furtüna, üngün nun es pü cuaint.. Cun adüna dapü temma ed ün amih mort in spedla chaminains nus inavaunt, tres fö e flamma. Zieva ün pêr minuts vzains ün aviun mellan sur nus ed ova chi vain giò dal tschêl scu cun sadellas. Nus vains üna via chi nun arda pü, che furtüna. Cun darcho ün pô dapü curaschi chaminains nus inavaunt. Nus vzains perfin ils autos chi sun auncha intacts. Circa 50 amihs cuorran tar nus e dian cha saja ün miracul cha nus essans auncha vivs. Eau di trist cha na tuots hegian survivieu e cha mieu amih saja mort. Tuots sun trists ed il portan tar üna ambulanza. Ils oters ed eau surdains las persunas da la chamanna a la tenda da samaritauns. Süjos tres e trists pigliains nus giò las chaplinas e cumanzains a discuorrer e dandettamaing odi ün sun reguler e dad ot. Eau stun sü, vegn our da let cumplettamaing staungel e bletsch e guard sül telefonin: «Brandmeldeanlage, Parkhaus Rondo!» Eau pigl mieu töf e vegn tal local da pumpiers. Lo inscuntri a mieu meglder amih. Nus pigliains il Pick-up e giains insembel a Puntraschigna. Sül viedi dischi be ad el: «Scha tü be savessast, che cha eau d’he insömgio quista not…»