Samedan es la vschinauncha da center d’Engiadin’Ota. Ma che significha que precis? Che respunsabilited ho eir üna vschinauncha chi ho ed es in quista funcziun? E cu cuntribuescha Samedan in quista rolla eir a l’attractivited da la vita quotidiauna dals indigens, dals giasts e da tuot la regiun?
Samedan es üna vschinauncha da center e’s distingua da vschinaunchas tuottafat turisticas. In quista rolla metta la vschinauncha nempe a disposiziun servezzans fundamentels ed infrastructuras per tuot la regiun e serva eir scu lö d’economia e d’uffizis chantunels.
Uschè as rechattan sün territori da Samedan eir varsaquauntas infrastructuras d’importanza per tuot la regiun, scu p.ex. la plazza aviatica, l’ospidel, il center d’attempos e da chüra. Impü sun da grand’importanza in sia funcziun da center las spüertas da furmaziun, trafic, administraziun ed economia.
Spüerta da furmaziun d’importanza surregiunela
Samedan ho üna spüerta da furmaziun cumplessiva chi taundscha da la scoulina a la scoula primara, reela e secundara, a l’Academia, la scoula media, l’an da tscherna da professiun scu eir la scoula ota da turissem e management, impü la scoula industriela e commerciela, il center d’informatica scu eir la chesa da giarsuns, üna spüerta d’abiter in möd accumpagno.
Quistas pussibiliteds da scolaziun attiran scolars e scolaras scu eir magistras e magisters da l’Engiadina, dal Grischun ed eir da tuot la Svizra. Samedan es uschè ün lö attractiv per abiter, lavurer e spordscha pussibiliteds per ulteriuors svilups per la magistraglia.
Center economic e lö da lavur regiunel
I’l plan directiv vain Samedan definieu scu lö da lavur regiunel. Uschè es Samedan eir ün center economic important illa regiun. Impustüt giò Cho d’Punt s’haun domiciliedas bgeras pitschnas e pü grandas impraisas d’importanza regiunela. Quistas dittas spordschan plazzas da lavur annuelas in branschas tradiziunelas e modernas e chi nu sun be dependentas dal turissem. Impü es la vschinauncha eir lö centrel per la trans-chargeda da la Viafier retica cun sieu depot. Dimena es eir la logistica e’l transport d’importanza centrela.
Buna accessibilited e center da trafic
Samedan es eir attractiv grazcha a sias bunas colliaziuns da trafic public culla VR e coincidenzas cul bus Engiadina scu eir grazcha a la rait da vias, fabriched’our bain. La plazz’aviatica, situeda il pü ot in Europa, fo eir part da l’importanza economica regiunela. Uschè haun eir chatto plazza numerus uffizis chantunels: l’uffizi per il trafic sün via, l’uffizi disctrictuel da construcziun bassa, l’uffizi da stima chantunel, l’uffizi d’inquisiziun e bgers oters.
Las sfidas d’üna vschinauncha da center
Natürelmaing ho Samedan in quista rolla eir grandas sfidas e respunsabilited. La vschinauncha ho da pisserer cha l’infrastructura per las impraisas da producziun ed indrizs vegna mantgnida ed eir fabricheda our adequatamaing.
Que significha cha’l provedimaint da vias, d’ova e forza electrica scu eir l’alluntanamaint d’immundizchas stöglian funcziuner fich bain da tuottas uras ed oras. Que vela eir per tuot las “organisaziuns da glüsch blova” ed uffizis chantunels, scu la pulizia, l’uffizi da construcziun bassa, il salvamaint Engiadin’Ota, il servezzan da chüra Spitex u eir la posta.
Quistas uschè dittas “chargias da center” sun factuors da cuosts considerabels supplementers cha Samedan ho da purter.
E la qualited da vita?
Però, cu es la qualited da vita in üna vschinauncha da center otalpina? Giò da tuot propi buna! Samedan es gnieu tschernieu e fo part a las top 100 vschinaunchas las pü attractivas da la Svizra – plazza 85 da passa 1000 (vair pag. 9).
Scha’s dumanda a la populaziun, es la resposta clera: La qualited da vita es ota grazcha a l’infrastructura d’excellenta qualited in cumbinaziun cul scharm da la vschinauncha e la natüra intacta. A do pü cu avuonda pussibiliteds da cumprer aint, cuorts tragets per river als servezzans, plazzas da lavur in vicinanza, üna granda spüerta culturela scu eir infrastructuras modernas per temp liber e sport – da la plazza da golf fin al center da sport Promulins. Però impustüt la ferma cumünaunza – grazcha eir las numerusas societeds localas e las üsaunzas – cuntribuescha ad üna vita cumünela ferma, cordiela ed activa.
Trad. rum. Nina Dazzi Andry
